दिल्ली, 02 नोव्हेंबर : दिल्लीत माणुसकीला काळीमा फासणारी अशी घटना शमोर आलीय. एक ३० वर्षांचा तरुण फिल्म प्रोड्युसर अपघातानंतर रस्त्यावर रक्ताच्या थारोळ्यात पडला होता. मात्र त्याला मदतीसाठी कुणीही पुढे आलं नाही. त्याऐवजी लोक फोटो काढत बसले होते. काही लोकांनी मदत केली आणि त्याला रुग्णालयात नेण्यात आले. मात्र उपचाराला उशिर झाल्याने त्याचा मृत्यू झाला.
टाइम्स ऑफ इंडियाने दिलेल्या वृत्तानुसार, पीयुष पाल याचा दिल्लीत अपघात झाला. तो जखमी अवस्थेत रस्त्यावर पडला होता. तेव्हा लोकांनी त्याला मदत करण्याऐवजी त्याचे फोटो काढले. जवळच्याच पेट्रोल पंपावर असलेल्या सीसीटीव्ही फुटेजमध्ये ही घटना कैद झाली आङे. पीयूष पालला एका दुसऱ्या बाईकने धडक दिली. त्यावेळी तो जमिनीवर पडला. त्याच्या चेहऱ्याला आणि डोक्याला गंभीर दुखापत झाली. ही घटना आउटर रिंग रोडवर आयआयटी क्रॉसिंगकडून नेहरू प्लेसकडे जाणाऱ्या मार्गावर रात्री ९.४५ वाजता घडली.
पीयूषला मदत करण्यासाठी काही जण थांबले होते. त्यापैकी एकाने सांगितलं की, तरुणाच्या डोक्यातून रक्तस्राव खूप झाला होता. तिथल्या लोकांनी तो अर्धा तास तिथेच पडला होता असं सांगितलं . काही लोकांना पीयूषला एका रिक्षात बसवून दवाखान्यात नेलं. तिथून त्याला पीएसआरआय मल्टीस्पेशालिटी रुग्णालयात पाठवण्यात आले. रात्री पावणे दहाला अपघात झाला, तर उपचार मिळण्यासाठी रात्रीचे अकरा वाजले होते.
अपघातानंतर पाऊण तासाने पोलीस घटनास्थळी दाखल झाले पण तेव्हा तिथे कुणीही नव्हते. जखमींना उपचारासाठी रुग्णालयात दाखल करण्यात आले. उपचारावेळी पीयूष पालचा मृत्यू झाला. शवविच्छेदन केल्यानंतर पीयूषचा मृतदेह त्याच्या कुटुंबियांकडे सोपवण्यात आला. बुधवारी सायंकाळी त्याच्यावर अंत्यसंस्कार करण्यात आले.
मराठी बातम्या, ब्रेकिंग न्यूज मराठीत सर्वात आधी News18Marathi वर.
आजच्या ताज्या बातम्या, सर्व लाइव्ह न्यूज अपडेट्स, सर्वात आधी वाचा विश्वासार्ह मराठी न्यूज वेबसाइट News18 मराठीवर.
