जयपूर, 02 नोव्हेंबर : सक्तवसुली संचालनालय अर्थात ईडीच्या अधिकाऱ्याला लाचलुचपत प्रतिबंधक विभागाने लाच घेताना रंगेहाथ पकडलं आहे. ईडीचा अधिकारी एका प्रकरणात सेटलमेंट करण्यासाठी आणि इतर सुविधा देण्यासाठी पीडीत व्यक्तीकडून 17 लाख रुपयांची मागणी करत होता. त्यातले 15 लाख रुपये देत असताना ईडी अधिकाऱ्यासह दोघांना एसीबीने अटक केली.
याबाबत मिळालेली माहिती अशी की, राजस्थानच्या लाचलुचपत प्रतिबंधक विभागाने ईडीमध्ये कार्यरत असलेला अधिकारी नवलकिशोर मीना आणि सहकारी बाबूलाल मीना यांना अटक केलीय. दोघेही 15 लाख रुपयांची लाच स्वीकारत होते. यानंतर अधिकाऱ्याच्या अनेक ठिकाणांवर एसीबीने छापे टाकले आहेत. एसीबीच्या वरिष्ठ अधिकाऱ्यांनी याबाबत माहिती दिलीय.
तरुण फिल्म प्रोड्युसरचा अपघातात मृत्यू; अर्धा तास रक्ताच्या थारोळ्यात, मदतीऐवजी लोकांनी काढले फोटो
मणिपूरमध्ये एका चिट फंड कंपनीच्या प्रकरणी सेटलमेंट करण्यासह इतर सुविधा पुरवण्याच्या नावावर ईडी अधिकाऱ्याने 17 लाखांची मागणी केली होती. शेवटी तडजोड करत 15 लाख रुपये देण्याची तयारी पीडित व्यक्तीने केली होती. ईडी अधिकाऱ्यासाठी काम करणाऱ्या सहकाऱ्यालाही एसीबीने अटक केली. अलवरमध्ये यासाठी सापळा रचण्यात आला होता. हे प्रकरण मोठं असल्याने एसीबीचे अधिकारी अलवरला पोहोचले आहेत.
एसीबीच्या अधिकाऱ्यांनी सांगितलं की, मणिपूरमध्ये काही दिवसांपूर्वी चिट फंड कंपनी चालवल्याबद्दल आणि फसवणूक केल्याच्या आरोपाखाली गुन्हा दाखल झाला होता. या प्रकरणी पीडित व्यक्तीकडे ईडीच्या अधिकाऱ्याने पैसे मागितले. पीडित व्यक्तीने याची माहिती लाचलुचपत प्रतिबंधक विभागाला दिली. यानंतर एसीबीने सापळा रचून नवलकिशोर मीनाला रंगेहाथ पकडलं. दोघांचीही एसीबी कार्यालयात चौकशी सुरू आहे.
मराठी बातम्या, ब्रेकिंग न्यूज मराठीत सर्वात आधी News18Marathi वर.
आजच्या ताज्या बातम्या, सर्व लाइव्ह न्यूज अपडेट्स, सर्वात आधी वाचा विश्वासार्ह मराठी न्यूज वेबसाइट News18 मराठीवर.
