सरकारने चार वर्षांखालील मुलांसाठी क्लोरफेनिरामाइन-फेनिलेफ्राइनच्या एफडीसीवर निर्बंध लादले

सरकारने चार वर्षांखालील मुलांमध्ये वापरण्यासाठी क्लोरफेनिरामाइन मॅलेट आणि फिनाइलफ्राइन हायड्रोक्लोराइड असलेल्या सर्व फिक्स्ड-डोस कॉम्बिनेशन्सच्या (FDCs) उत्पादन, विक्री आणि वितरणावर निर्बंध घातले आहेत आणि या वयोगटात त्यांच्या वापराविरुद्ध स्पष्ट चेतावणी देणे अनिवार्य केले आहे.

लहान मुलांचे आरोग्य आणि सुरक्षितता जपण्याच्या उद्देशाने हे पाऊल उचलण्यात आले आहे. उत्पादकांना उत्पादनाच्या लेबलवर, पॅकेज इन्सर्टवर आणि प्रचारात्मक साहित्यावर, “फिक्स्ड डोस कॉम्बिनेशन चार वर्षांखालील मुलांमध्ये वापरले जाऊ नये,” ही चेतावणी ठळकपणे प्रदर्शित करण्याचे निर्देश देण्यात आले आहेत.

यापूर्वी, १५ एप्रिल, २०२५ रोजीच्या अधिसूचनेद्वारे [एस.ओ. १७१७(ई)], सरकारने हे दोन घटक असलेल्या काही एफडीसींवर असेच निर्बंध लादले होते. नवीनतम अधिसूचनेनुसार, क्लोरफेनिरामाइन मॅलेट आणि फिनाइलफ्राइन हायड्रोक्लोराइड असलेल्या सर्व फॉर्म्युलेशन्ससाठी वयो-विशिष्ट चेतावणीची आवश्यकता लागू करण्यात आली आहे.

हा निर्णय एका तज्ञ समिती आणि औषध तांत्रिक सल्लागार मंडळाच्या (DTAB) शिफारशींनंतर घेण्यात आला आहे.  सरकारने नमूद केले आहे की, या मिश्रणांच्या वापरामुळे चार वर्षांखालील मुलांना धोका निर्माण होऊ शकतो आणि अधिक सुरक्षित पर्याय उपलब्ध आहेत.

ही अधिसूचना सार्वजनिक आरोग्याच्या हितासाठी, औषधे आणि सौंदर्यप्रसाधने अधिनियम, १९४० च्या कलम २६अ अंतर्गत जारी करण्यात आली असून, ती शासकीय राजपत्रात प्रसिद्ध झाल्याच्या तारखेपासून अंमलात येईल.